Angliya futbolining ikkinchi ligasidagi "Blekbern" va "Ipsvich Taun" o‘rtasidagi Chempionship uchrashuvi to‘liqligicha takroran o‘tkaziladi.
Jamoalar 20 sentyabr, shanba kuni to‘qnash kelishgandi.
O‘yinning 79-daqiqasida, hisob 1:0 ko‘rinishida bo‘lganda hakam kuchli yomg‘ir tufayli jamoalarni maydondan olib chiqib ketdi. O‘shanda maydon yaroqsiz holga kelgandi.
"Kengash har ikki klubning fikrini inobatga olgan holda reglamentga muvofiq barcha mumkin bo‘lgan variantlarni har tomonlama ko‘rib chiqdi.
Yakunda ko‘pchilik ovoz bilan o‘yinni to‘liq qayta o‘tkazish uchun qaror qabul qilindi", - deyiladi Angliya futbol ligasi saytida.
