2–11 oktyabr kunlari Norvegiyaning Forde shahrida og‘ir atletika bo‘yicha jahon chempionati bo‘lib o‘tadi. Bu safar bir maydonda uchta Olimpiadada turli vazn toifalarida g‘olib chiqqan chempionlar to‘qnash keladi.

Musobaqada olti nafar olimpiya chempionlari qatnashadi. Bu yaxshi ko‘rsatkich, chunki Rio, Tokio va Parij Olimpiadalarida chempion bo‘lgan ko‘plab xitoylik sportchilar ishtirok etmaydi — ayrimlari faoliyatini yakunlagan, boshqalari esa noyabrda bo‘lib o‘tadigan Xitoy milliy o‘yinlariga hozirlik ko‘rmoqda.

Biz uchun eng muhim bellashuv 110 kg vazn toifasida bo‘ladi. Bu safar ikki asosiy raqib ham O‘zbekistondan: Rio–2016 chempioni, 33 yoshli Ruslan Nurudinov hamda undan 8 yosh kichik Tokio–2020 g‘olibi Akbar Jo‘rayev o‘zaro kuch sinashadi.

Nurudinov bir yarim yil avval bel jarohati sabab sport karyerasini yakunlash haqida o‘ylagan edi. Ammo u sportga qaytib, yuqori formaga kirdi va o‘tgan yil dekabr oyida Bahrayndagi jahon chempionatida siltab ko‘tarishda 242 kg.ni ko‘tarib, jahon rekordi o‘rnatdi hamda eng yaqin raqibidan 20 kg ustun bo‘ldi.

Jo‘rayev esa Parijda ikkinchi o‘rinni egallab, Lyu Syuanxuaga yutqazganidan keyin faqat bir marta musobaqada qatnashdi. Hozirda mashg‘ulotlarda yuqori natijalar ko‘rsatmoqda. Har ikki sportchimizning ham 195–237–427 standart ko‘rsatkichlarini yangilash imkoniyati bor.

94 kg vazn toifasida ham yulduzlar to‘plandi. 9 oktyabr kuni «A» guruhida Rio–2016 chempioni Kianush Rostami, Tokio–2020 g‘olibi Meso Hassona va Parij–2024 chempioni, 21 yoshli rekordchi Karlos Nasar bellashadi.

Fordedagi oltinchi olimpiya chempioni — indoneziyalik Rizki Juniansyah. U ham jamoadoshi bilan birga 79 kg vaznda bahs olib boradi. Bu toifada bir nechta sportchilar allaqachon jahon rekordlarini yangilagan — 166–203–362.

Shuningdek, musobaqada ko‘plab kuchli atletlar ham ishtirok etadi: koreyalik Son Hyonxo, venesuelalik olimpiya medali sohibi Xulio Mayora, qozog‘istonlik Yedige Yemberdi, italiyalik Oskar Reyes va misrlik Muhammad El-Sayid.

Chempionat ishtirokchilari orasida yosh jihatdan katta farq bor: eng yosh sportchi — 14 yoshli kuvaytlik Muhammad Alotaibiy bo‘lib, u ilk sessiyada 60 kg vazn toifasida qatnashadi. Eng keksa ishtirokchi esa 40 yoshli chexiyalik olimpiyachi Kamil Kuchera, u so‘nggi kuni «B» guruhida eng og‘ir toifada bellashadi.

Shunday qilib, bu yilgi Forde jahon chempionati juda keskin va yorqin to‘qnashuvlarga boy bo‘lishi kutilmoqda.