«Arsenal» himoyachisi Vilyam Saliba nega London klubida qolish qarorini qabul qilganini izohladi.

Fransiyalik futbolchi «kanonirlar» bilan birga sovrinlar yutishni xohlashini aytdi. U hozirgi klubini yaxshi ko‘rishini ham ta’kidladi.

«Nega «Real»ga rad javob berdim? Trent Aleksander-Arnold bolaligidan «Liverpul» muxlisi bo‘lganiga qaramay, ularning jozibasi uchun sevgan klubini tark etdi. U «Liverpul» bilan bir nechta sovrin yutgan. Men esa bu yerda hozircha Angliya Kubogidan boshqa hech narsa yuta olmadim.

Men qolib, ko‘plab sovrinlarni qo‘lga kiritishni istayman. Bu klubni yaxshi ko‘raman. Men hali unga munosib javob berolmadim. Chunki hozirgacha ko‘zga ko‘rinarli sovrin yutmadim. Shuning uchun qolishni va g‘alabalar qozonishni xohlayman», — deya Salibaning so‘zlarini Football.london keltirdi.

Vilyam Saliba «Arsenal» bilan mehnat shartnomasini uzaytirdi. Yangi shartnoma 2030 yil yozigacha amal qiladi. OAV ma’lumotlariga ko‘ra, «Real» futbolchiga katta qiziqish bildirgan.