Osiyo Chempionlar ligasi 2 musobaqasining «B» guruhi 2-tur doirasida Andijondagi “Bobur arena” stadionida katta futbol bayrami bo‘lib o‘tadi. 1 oktyabr sanasida «Andijon» klubi Qatarning «Al-Ahli» klubini qabul qiladi.

Ilk turda «Al-Ahli» Bahraynning «Al-Xolidiya» jamoasiga qarshi bellashdi va uchrashuvda hisob ochilmadi - 0:0.

«Al-Ahli» klubi 1950 yilda tashkil etilgan. Bu jamoa 5 marotaba Qatarda Kuboklarni boshi uzra ko‘targan.

Jamoani xorvatiyalik 47 yoshli mutaxassis Igor Bishchan boshqarib bormoqda. U ilgari Xorvatiya U21 terma jamoasi, Zagrebning «Dinamo» klubiga ham ustozlik qilgan.

«Al-Ahli» safida yulduz legionerlar bor. Jumladan 2014 yilgi mundialda Germaniya terma jamoasi tarkibida o‘ynab, jahon chempioniga aylangan Yulian Draksler 2023 yilning sentyabr oyidan buyon ”Al-Ahli” safida to‘p surib kelmoqda. Shuningdek, ushbu jamoada Ibrohim Diallo, Michel Vlap, Erik Espozito singari Yevropa chempionatlarida to‘p surgan tajribali legionerlari ham bor.

«Al-Ahli» uy o‘yinlarini “Hamad Bin Xalifa” stadionida o‘tkazadi va o‘z bag‘riga 20 ming tomoshabinni sig‘diradi.

Qatar Yulduzlar ligasida 12 ta ishtirokchi bo‘lib, «Al-Ahli» ayni paytda 6 ta turdan so‘ng 2 g‘alaba va 4 mag‘lubiyat qayd etib, to‘plar nisbati 7:13 ni tashkil qilgan holda 6 ochko bilan 9-pog‘onani band etib turibdi.

Yana bir gap: «Al-Ahli» klubida andijonlik futbolchi to‘p surganini bilasizmi? 2011/2012 yilgi mavsumlarda Andijon futboli tarbiyalanuvchisi hisoblangan Shavkat Mullajonov aynan Qatarning «Al-Ahli» klubi sharafini himoya qilgan.