O‘zbekiston Superligasining 24-turi doirasida «Navbahor» Urganchda «Xorazm» mehmoni bo‘ladi.

Ta’kidlash joizki, urganchliklar 14 yillik tanaffusdan so‘ng, yana Superligaga qaytishdi.   

Mazkur jamoalar O‘zbekiston chempionatlarida shu kungacha o‘zaro 17 marta ro‘baro‘ kelishgan. O‘tkazilgan bahslarning 13 tasida namanganliklar yutuqqa erishishgan bo‘lsa, 2 ta uchrashuvda durang qayd etilgan, 2 ta o‘yinda esa urganchliklar zafar quchishgan. To‘plar nisbati –  44-10, «Navbahor» foydasiga.

Ushbu klublar o‘rtasidagi o‘yinlarda «Navbahor»ning eng yirik hisobdagi g‘alabasi 10:0 hisobi qayd etilgan bellashuv bo‘lib, «lochinlar» 2006 yilgi mavsumda o‘z maydonlarida shu hisobda zafar quchishgan.

«Xorazm» esa hali «Navbahor»ni yirik hisobda mag‘lubiyatga uchratolmagan.

O‘zaro o‘yinlarda namanganliklar 41 ochkoni, urganchliklar esa 8 ochkoni qo‘lga kiritishgan.

Urganchda o‘tkazilgan 8 ta uchrashuvning 2 tasida mezbonlar, 4 tasida «lochinlar» zafar quchishgan, 2 ta o‘yinda esa durang qayd etilgan (1996 yili «Xorazm» «Dinamo» nomi ostida o‘ynagan).

Urganchliklar o‘z maydonida o‘tkazilgan bahslarda namanganliklar darvozasiga 6  ta gol urib, o‘z darvozasidan 11 ta to‘p o‘tkazib yuborishgan.

Mazkur jamoalarning 1-davrada Namanganda bo‘lib o‘tgan bellashuvida vakillarimiz Zabihillo O‘rinboyevning 50-daqiqada penaltidan urgan goli evaziga 1:0 hisobida g‘alaba qozonishgandi.

Urganchda o‘tkazilgan barcha uchrashuvlar:

1996 yil. «Dinamo» – «Navbahor» – 0:2
1997 yil. «Xorazm» – «Navbahor» – 0:0
1998 yil. «Xorazm» – «Navbahor» – 1:0
1999 yil. «Xorazm» – «Navbahor» – 0:1
2000 yil. «Xorazm» – «Navbahor» – 2:2
2006 yil. «Xorazm» – «Navbahor» – 0:5
2009 yil. «Xorazm» – «Navbahor» – 3:1
2010 yil. «Xorazm» – «Navbahor» – 0:1.

Eslatib o‘tamiz, «Xorazm» – «Navbahor» bahsi 3 oktyabr kuni Urganch shahridagi «Xorazm» sport majmuasida soat 17:00 da start oladi.

«Navbahor» PFK matbuot xizmati.