"Barselona" hujumchisi Robert Levandovskining amaldagi shartnomasi kelasi yozda o‘z nihoyasiga yetadi. Agar klub tegishli bandni faollashtirishga qaror qilsa, yulduz faxriy yana bir yil qolishi mumkin, ammo bunday ssenariy ehtimoli unchalik yuqori emas. Catalunya Radio xabariga ko‘ra, "ko‘k-anorranglilar" rahbariyati hozircha 37 yoshli futbolchi bilan shartnomani uzaytirish bo‘yicha muzokara o‘tkazmayapti. "Barsa" yanvargacha kutishni rejalashtirmoqda, shundan so‘ng xulosalar chiqariladi.
Robert Levandovski joriy mavsumda 8 ta o‘yinda 4 ta gol urdi. Polshalik hujumchi hozircha asosiy tarkib uchun kurashda Ferran Torresga yutqazmoqda.
