Inklyuziv ta’lim rivoji yo‘lida Ijtimoiy himoya milliy agentligi tomonidan ko‘plab tashabbuslar ilgari surilmoqda.

Buning uchun barcha davlat tashkilotlari bilan birga xalqaro tashkilotlar bilan ham muntazam hamkorlik yo‘lga qo‘yilmoqda.

Xususan, joriy yilning 5–9 oktyabr kunlari O‘zbekiston davlat jismoniy tarbiya va sport universitetida Ijtimoiy himoya milliy agentligi, A.I.Gersen nomidagi Rossiya davlat pedagogika universitetining Toshkent shahridagi filiali hamda O‘zbekiston adaptiv sport turlari assosiasiyasi hamkorligida qisqa muddatli o‘quv-seminar o‘tkazilmoqda.

Nogironligi bo‘lgan shaxslar bilan ishlash, ularni sportga jalb etish va qiziqtirish, jismoniy reabilitasiya, klassifikasiya, raqamlashtirish, ushbu sohada davlat va nodavlat tashkilotlarning roli, adaptiv sport turlari hamda nufuzli xalqaro musobaqalar to‘g‘risida nazariy va amaliy darslar o‘quv dasturining asosiy g‘oyasini tashkil etadi.

Ushbu seminarda alohida ta’lim ehtiyojlari bo‘lgan bolalar uchun ixtisoslashtirilgan maktab va maktab-internatlarining jismoniy tarbiya o‘qituvchilari, “Muruvvat” internat uylarining davolovchi jismoniy tarbiya yo‘riqchilari, shuningdek, katta yoshdagilar va og‘ir ijtimoiy vaziyatga tushib qolgan oilalar bilan ishlash sho‘’ba xodimlari ishtirok etmoqda.

Bundan ko‘zlangan maqsad esa mutaxassislarning malakasini oshirish orqali nogironligi bo‘lgan shaxslarga nisbatan to‘g‘ri munosabat shakllantirishdan iborat.