Инклюзив таълим ривожи йўлида Ижтимоий ҳимоя миллий агентлиги томонидан кўплаб ташаббуслар илгари сурилмоқда.

Бунинг учун барча давлат ташкилотлари билан бирга халқаро ташкилотлар билан ҳам мунтазам ҳамкорлик йўлга қўйилмоқда.

Хусусан, жорий йилнинг 5–9 октябрь кунлари Ўзбекистон давлат жисмоний тарбия ва спорт университетида Ижтимоий ҳимоя миллий агентлиги, А.И.Герсен номидаги Россия давлат педагогика университетининг Тошкент шаҳридаги филиали ҳамда Ўзбекистон адаптив спорт турлари ассоциацияси ҳамкорлигида қисқа муддатли ўқув-семинар ўтказилмоқда.

Ногиронлиги бўлган шахслар билан ишлаш, уларни спортга жалб этиш ва қизиқтириш, жисмоний реабилитация, классификация, рақамлаштириш, ушбу соҳада давлат ва нодавлат ташкилотларнинг роли, адаптив спорт турлари ҳамда нуфузли халқаро мусобақалар тўғрисида назарий ва амалий дарслар ўқув дастурининг асосий ғоясини ташкил этади.

Ушбу семинарда алоҳида таълим эҳтиёжлари бўлган болалар учун ихтисослаштирилган мактаб ва мактаб-интернатларининг жисмоний тарбия ўқитувчилари, “Мурувват” интернат уйларининг даволовчи жисмоний тарбия йўриқчилари, шунингдек, катта ёшдагилар ва оғир ижтимоий вазиятга тушиб қолган оилалар билан ишлаш шўъба ходимлари иштирок этмоқда.

Бундан кўзланган мақсад эса мутахассисларнинг малакасини ошириш орқали ногиронлиги бўлган шахсларга нисбатан тўғри муносабат шакллантиришдан иборат.