"Real" prezidenti bo‘lib ishlab kelayotgan Florentino Peres yulduz futbolchidan voz kechdi.
Transfer News Live nashrining Defensa Central’ga tayanib xabar berishicha, Madrid superklubi rahbari yarim himoyachi Rodrini o‘z safiga qo‘shib olish imkoniyatini istisno qilgan. Peresning fikricha, Rodrining yaqinda olgan jarohatlarini inobatga olgan holda, uning yuqori narxini oqlab bo‘lmaydi.
Avvalroq, Rodrini "Manchester Siti" sotmoqchi emasligi haqida xabarlar tarqalgan edi.
Nufuzli Transfermarkt portali mutaxassislari 29 yoshli Rodrini 110 million yevroga baholamoqda. Amaldagi shartnoma yarim himoyachini "shaharliklar" bilan 2027 yilning yarmigacha bog‘lab turadi.













