Bugun O‘zbekiston aralash jang san’atlari assosiasiyasining navbatdan tashqari hisobot saylov-konferensiyasi bo‘lib o‘tdi. Unda Ichki ishlar vazirligi, Sport vazirligi, MOQ rahbariyati va soha mutasaddilari ishtirok etishdi.
Konferensiya davomida assosiasiya rahbariyati qayta shakllantirilib, yaqin davr uchun ustuvor rejalar muhokama qilindi. Ichki ishlar vaziri, general-leytenant Aziz Tashpulatovning mamlakat voleybol federasiyasi rahbari sifatidagi muvaffaqiyatli faoliyati inobatga olinib, uning nomzodi O‘zbekiston aralash jang san’atlari assosiasiyasi raisi lavozimiga ilgari surildi. Nomzodlar ushbu taklifni bir ovozdan ma’qullashdi va Aziz Anvarovich O‘zbekiston aralash jang san’atlari assosiasiyasi raisi etib saylandi.
Shuningdek, assosiasiya raisining o‘rinbosarlari, bosh kotib va ijrochi direktorlari ham saylanib, rahbariyat tarkibi to‘liq shakllantirib olindi.
Tadbirda so‘z olgan rasmiylar assosiasiya rahbariyatini mas’uliyatli lavozim bilan qutlab, sharafli vazifalarini amalga oshirishlari yo‘lida omad va muvaffaqiyatlar tilashdi.
