O‘zbekiston futbol assosiasiyasi boshqarmasi sobiq rahbari Alisher Nikimbayev Italiya terma jamoasining sobiq futbolchisi Fabio Kannavaroning O‘zbekiston milliy jamoasi bosh murabbiyi etib tayinlanishi haqida fikr bildirdi.

«Kannavaroni O‘zbekiston terma jamoasiga tayinlash — tavakkal qadam. Federasiya o‘zi istaganidek xorijlik murabbiy topdi. Lekin qo‘rqinchli tomoni — jamoani terma darajasida ish tajribasi bo‘lmagan murabbiy boshqarmoqda. Umid shundaki, Kannavaro futbolni yaxshi tushunadi. U sportni ichi-ichidan biladi, shuning uchun bu ishni bajara olishi mumkin. Hamma ish uning hissiyotiga bog‘liq. Lekin meni bezovta qilgan jihat — Kannavaro terma jamoani hech qachon to‘liq boshqarmagan. Bu har kuni jamoa bilan ishlashdan farq qiladi. Terma bilan faqat yig‘inlarda uchrashish — boshqa narsa», — dedi Nikimbayev.

6 oktyabr kuni O‘zbekiston terma jamoasi matbuot xizmati Fabio Kannavaroning bosh murabbiy sifatida rasman tayinlanganini ma’lum qildi. 52 yoshli mutaxassis terma jamoani 2026 yilgi Jahon chempionatida boshqarib boradi.

Avvalroq Kannavaro Xitoy terma jamoasi, «Udineze», Zagrebning «Dinamo», «Benevento», «An-Nasr», «Guanchjou Evergrand» va «Tyanszin Syuanszyan» klublarida murabbiy sifatida faoliyat yuritgan.