Angliya terma jamoasining sobiq yarimhimoyachisi Jo Koul 40 yoshli portugaliyalik hujumchi Krishtianu Ronaldu haqida fikr bildirdi.

«U go‘yo tibbiyot qonunlariga qarshi chiqyapti. Esimda, u 35 yoshda bo‘lganida aytgandim: “U kamida 45 yoshgacha o‘ynaydi”, — shunda hamma meni jinni deb o‘ylagan edi. Men esa: “Ko‘ramiz, u hali ham gol urib yuradi”, — degandim. Bu haqiqatan ham aqlbovar qilmas narsa. Ha, u hozir o‘ynayotgan liga ko‘p tanqid qilinadi. Lekin agar u karyerasini uzaytirmoqchi bo‘lsa, Premyer-liga, La Liga yoki Bundesligada bunday imkoniyatga ega bo‘lolmaydi. U Saudiya ligasida o‘ynayapti va hali ham doimiy ravishda gol urmoqda.

Portugaliya terma jamoasi safida o‘ynaganda ham, raqiblarning taxminan 85 foizi undan avvalgidek jismoniy kuch talab qilmaydi. Uni shunchaki darvoza oldiga qo‘ying — u baribir gol uradi. Shuning uchun, afsuski, Irlandiya uchun yomon xabar — menimcha, Portugaliya ishonchli g‘alaba qozonadi, 4:0», — deydi Koul Goal nashriga bergan intervyusida.

Ronaldu 2023 yildan beri “An-Nasr” jamoasi sharafini himoya qilib kelmoqda. Uning klub bilan shartnomasi 2027 yilgacha mo‘ljallangan.