"Chelsi" hujumchisi Mark Giu jamoadagi o‘rni haqida gapirdi. Yozda "ko‘klar" ispaniyalikni "Sanderlend"ga ijaraga berishdi, ammo ko‘p o‘tmay Liam Delapning jarohati tufayli yana o‘z safiga chaqirib olishdi. O‘shandan beri 19 yoshli hujumchi atigi bir marta maydonga tushdi - u "Liverpul"ga qarshi bahs oxirida zaxiradan o‘yinga qo‘shildi.
"Hozirda faoliyatim qanday ketayotgani meni qoniqtiradi. Men "Chelsi"daman, hozir bu men uchun eng yaxshi klub," - deya futbolchining so‘zlarini keltiradi jurnalist Fabrisio Romano.
Mark Giu o‘tgan mavsum starti oldidan "Barselona"dan London grandi safiga qo‘shilgandi. Umuman olganda, futbolchi "Chelsi"ning asosiy tarkibida 17 ta o‘yin o‘tkazib, 6 ta gol urgan.
