Qariyib 10 yil davomida «Liverpul» tizimida kamol topib, zamonamizning eng mahoratli qanot himoyachilaridan biriga aylangan Trent Aleksander-Arnold avvalgi mavsum yakunida «Real» libosini kiyish ishqida «qizillar» bilan xayrlashdi. Tabiiyki, Arne Slot jamoasi asli liverpullik futbolchini olib qolishga rosa urindi, biroq Trent faoliyatida tub burilish yasash fikridan qaytmadi. U yaqinda GK jurnaliga bergan intervyusida jonajon jamoasidan ketish qarori xususida yana bir marta atroflicha to‘xtaldi.

«Liverpul»dan ketishi

- Tan olaman, hayotimdagi eng og‘ir qarorlardan birini qabul qilishimga to‘g‘ri keldi. Zero, «Liverpul» qadron uyimga aylangandi. Aynan shu klub tufayli o‘zim sevgan mashg‘ulot bilan shug‘ulanish va yashash baxtiga muyassar bo‘ldim. Shuningdek, «Enfild»da ko‘plab unutilmas voqeliklarni boshdan kechirdim, turli sovrinlar sohibiga aylandim. Lekin qachondir yangi chaqiriq bo‘lishi va ko‘nikilgan muhitni o‘zgartirish xohishi tug‘ilishi tabiiy edi. O‘ylaymanki, jamoadan ketish uchun qulay fursatni to‘g‘ri tanlay oldim.

«Real»ning chorlovi

- «Madrid» shubhasiz, istalgan futbolchini o‘ziga mahliyo qiladigan jamoa hisoblanadi. Shuning barobarida bunday katta klubda o‘ynab ketish naqadar qiyinligi ham barchaga ma’lum. Ochig‘i, buni yangi imkoniyat o‘laroq qabul qildim va salohiyatimni to‘liq ishga solish ishqida yonyapman. «Bernabeu» - muqaddas maskan. Mana, «Qirollik klubi» libosini kiygach, buning yuki nechog‘li og‘irligini yaqqol his qildim. Bir so‘z bilan aytganda, «Real»da ekanligimning o‘ziyoq hattoki, mashg‘ulotlarda bor kuchni sarflashimni taqozo etadi.

Bellingemning ta’siri

- Ochig‘i, bir to‘xtamga kelish jarayonida Jud bilan bir necha marta gaplashdim. U klub va Madriddagi ichki muhit haqida faqat ijobiy fikrlar aytdi. Shu tariqa menda o‘z salohiyatimni yangi joyda sinab ko‘rish xohishi kuchaydi. «Real»ning ulkan qadriyatlari shundoq ham ma’lum edi va bunday klub chorlovidan ko‘z yumish oson emas. «Liver­pul»dan ketishim esa jamoa ambisiyalari emas, balki shaxsiy yondashuvga bog‘liq.

APL va La Liga o‘rtasidagi farq

- Ispaniya chempionati uslub va keskinlik nuqtai nazaridan APLdan biroz farqlanishi sezilmoqda. Muhimi, bu yerda ham futboldan chinakamiga zavqlanish uchun barchasi mavjud. Albatta, maqsadim katta - «Madrid» tarixiga qalin iz bosishni istayman. Shunchaki, futbolchi emas, balki shaxs sifatida ham.

Shaxsiy qarashlar o‘zgarishi

- Tabiiyki, bu o‘tish nafaqat professional futbol nuqtai nazaridan, balki shaxsiy hayot masalasida ham keskin o‘zgarish hisoblanadi. Axir yangi mamlakat, yangi madaniyat - bularning barchasi sizga shaxs sifatida yangicha turtki beradi.

Ismi bo‘yicha chalkashliklar...

- Yevropada juda ko‘pchilik ismim bilan murojaat qilishda chalkashib ketadi. Kimlardir Aleks, boshqalar Arnold, deb chaqirishadi. Shuning uchun o‘zim buni soddalashtirdim - Trent.

Madrid shahriga baho

- Madrid xuddi Liverpul kabi tarixiy va go‘zal shahar. Bu yerda til o‘rganayotganim, yangi sarguzashtlarni boshdan kechirayotganim va shaharning boy madaniyatini his qilayotganimdan bag‘oyat xursandman.

MUHAMMADXON tayyorladi