Italiya terma jamoasi darvozaboni Janluiji Donnarumma Isroilga (3:0) qarshi o‘yindan so‘ng intervyu berdi.
"Skuadra adzurra" qatorasiga beshinchi uchrashuvda g‘alaba qozondi, ammo Norvegiyadan uch ochko ortda qolgan holda guruhda ikkinchi o‘rinni egallab turibdi. Iyun oyida bo‘lib o‘tgan o‘zaro bahsda italiyaliklar Skandinaviya terma jamoasiga yirik hisobda yutqazishgandi (0:3), shundan so‘ng Luchano Spalletti murabbiylik lavozimini tark etgani e’lon qilindi. Uning o‘rnini Jennaro Gattuzo egalladi.
"Hozirda xato qilishga haqqimiz yo‘q - aks holda jahon chempionatiga to‘g‘ridan-to‘g‘ri yo‘l olish uchun so‘nggi imkoniyatdan mahrum bo‘lamiz. Ammo biz noyabr oyidagi o‘yinlar va ehtimoliy pley-off o‘yinlariga tayyormiz. Bizda kuchli jamoa bor va biz JCH-2026ga boramiz, bunga ishonchim komil," - dedi Donnarumma Sky Sport nashriga bergan intervyusida.
Noyabr oyida Italiya terma jamoasi Moldova (safarda, 13.11) va Norvegiya (uyda, 16.11) bilan kuch sinashadi.
