O‘zbekistonlik UFC jangchisi Bogdan Guskovning navbatdagi jangini sobiq chempion, 42 yoshli polshalik aralash jang san’ati ustasi Yan Blaxovichga qarshi o‘tkazadi. Bu haqda UFC matbuot xizmati xabar berdi.

Unga ko‘ra, jang 6 dekabr kuni UFC 323 turniri doirasida AQSHning Nevada shtati, Las-Vegas shahridagi “T-Mobile” majmuasida bo‘lib o‘tadi.

Bogdan Guskov oxirgi jangini joriy yilning iyul oyida, Abu-Dabida bo‘lib o‘tgan UFC on ABC 9 turnirida Nikita Krilovga qarshi o‘tkazgan. Mazkur bahsda Guskov birinchi raunddayoq raqibini nokautga uchratgan edi. O‘zbekistonlik sportchi UFC promousheni doirasida hozirga qadar jami 5 ta jang o‘tkazib, shulardan 4 martasida g‘alaba qozongan bo‘lsa, 1 bahsda mag‘lubiyatga uchragan.

Uning navbatdagi raqibi 42 yoshli sobiq chempion Yan Blaxovich oxirgi jangini mart oyida o‘tkazgan. U UFC Fight Night 255 turnirida Karolos Ulbergga qarshi oktagonga chiqib, hakamlar yakdil qarori bilan mag‘lubiyatga uchragan. Blaxovich faoliyati davomida 41 marta oktagonga chiqib, shularning 29 martasida g‘alaba qozongan, 11 bor mag‘lub bo‘lgan bo‘lsa, 1 jangda durang qayd etilgan.