Noyabr oyida Angliya chempionati ishtirokchilari maosh va transferlarga sarflanadigan xarajatlarni cheklovchi tizimni joriy etish bo‘yicha ovoz berishda qatnashadi. Bu haqda The Times nashri xabar bermoqda.

Mazkur cheklovga ko‘ra, har bir klubning xarajatlari mavsum davomida qo‘lga kiritilgan mukofot pullari va televideniye daromadlari miqdoridan 5 barobardan oshmasligi lozim. Misol uchun, o‘tgan mavsumda 20-o‘rinni egallagan klub ("Sheffild Yunayted", taxminan 109,5 million funt sterling daromad bilan) uchun cheklov taxminan 550 million funt sterlingni tashkil etgan bo‘lardi.

"Manchester Yunayted" va "Manchester Siti" klublari bu taklifga qarshi chiqmoqda. Ularning fikricha, bunday cheklov ularning raqobatbardoshligini pasaytirishi va ingliz futbolining umumiy nufuziga salbiy ta’sir ko‘rsatishi mumkin. Shuningdek, ular jarima ochkolarini nazarda tutuvchi sanksiyalar tizimi haddan tashqari qattiq va adolatsiz bo‘lishi mumkinligidan xavotirda ekanliklarini bildirmoqda.