Dilshod Rahmatov boshchiligidagi futzal bo‘yicha O‘zbekiston o‘smirlar terma jamoasi bugun tunde Bahraynga — III Osiyo yoshlar o‘yinlariga jo‘nab ketadi. Safar oldidan o‘smirlarimiz oldindan rejalashtirilgan qirg‘izistonlik tengqurlariga qarshi ikkinchi ko‘rik nazorat uchrashuvini o‘tkazishdi. O‘yin Toshkent axborot texnologiyalari universiteti sport zalida bo‘lib o‘tdi.

Ikki kun muqaddam mazkur jamoalarning birinchi uchrashuvida O‘zbekiston o‘smirlar terma jamoasi yirik — 8:2 hisobida g‘alaba qozongan edi. Bugungi bahsda esa Dilshod Rahmatov boshchiligidagi murabbiylar shtabi o‘smirlarimiz safar oldidan kutilmagan jarohatlarga duchor bo‘lmasligini ta’minlash maqsadida o‘ta ehtiyotkor o‘yin taktikacini tanlashdi. Asosan ko‘proq to‘pni nazoratda ushlash, raqibning tezkor qarshi hujumlarini kutib olish, standart vaziyatlardan foydalanishlariga yo‘l qo‘ymaslik, o‘z navbatida tashabbusni qo‘lga olib, kutilmagan kombinasiyalarni amalga oshirish, jamoaviy o‘yinni kuchaytirish kabi ishlanmalarga ko‘proq urg‘u qaratildi.

O‘zbekiston – Qirg‘iziston o‘smirlar terma jamoalari o‘rtasidagi ikkinchi nazorat uchrashuvida 2:2 hisobigagi durang natija qayd etildi.