Дилшод Раҳматов бошчилигидаги футзал бўйича Ўзбекистон ўсмирлар терма жамоаси бугун тунде Баҳрайнга — III Осиё ёшлар ўйинларига жўнаб кетади. Сафар олдидан ўсмирларимиз олдиндан режалаштирилган қирғизистонлик тенгқурларига қарши иккинчи кўрик назорат учрашувини ўтказишди. Ўйин Тошкент ахборот технологиялари университети спорт залида бўлиб ўтди.

Икки кун муқаддам мазкур жамоаларнинг биринчи учрашувида Ўзбекистон ўсмирлар терма жамоаси йирик — 8:2 ҳисобида ғалаба қозонган эди. Бугунги баҳсда эса Дилшод Раҳматов бошчилигидаги мураббийлар штаби ўсмирларимиз сафар олдидан кутилмаган жароҳатларга дучор бўлмаслигини таъминлаш мақсадида ўта эҳтиёткор ўйин тактикаcини танлашди. Асосан кўпроқ тўпни назоратда ушлаш, рақибнинг тезкор қарши ҳужумларини кутиб олиш, стандарт вазиятлардан фойдаланишларига йўл қўймаслик, ўз навбатида ташаббусни қўлга олиб, кутилмаган комбинацияларни амалга ошириш, жамоавий ўйинни кучайтириш каби ишланмаларга кўпроқ урғу қаратилди.

Ўзбекистон – Қирғизистон ўсмирлар терма жамоалари ўртасидаги иккинчи назорат учрашувида 2:2 ҳисобигаги дуранг натижа қайд этилди.