Ikki kundirki, sayyoramizning eng katta quruqlikka ega hududi — Osiyo sport muxlislarining diqqat-e’tibori Bahrayn mamlakatiga qaratilgan. Bahrayn qirolligi qit’a yoshlarining eng yirik sport anjumani — III Osiyo yoshlar o‘yinlariga start berildi. Sportning 28 yo‘nalishi bo‘yicha qit’amizning eng kuchli, iqtidorli yoshlari qariyb ikki hafta mobaynida g‘oliblik uchun bahs olib borishadi.

Osiyo o‘yinlarining futzal turida mamlakatimiz sharafini himoya etadigan O‘zbekiston o‘smirlar terma jamoasi “A” guruhida musobaqa mezboni — Bahrayn, shuningdek, Afg‘oniston hamda Xitoy terma jamoalariga qarshi maydonga chiqadi. Dastlabki uchrashuv 24 oktyabr sanasida Afg‘oniston terma jamoasiga qarshi bo‘lib o‘tadi.

Osiyo o‘yinlari dasturidan o‘rin olgan futzal bahslari Bahrayn mamlakatining shimoliy qismida joylashgan Isa Taun shahridagi 3600 tomoshabinga mo‘ljallangan “Xalifa sport siti” majmuasida bo‘lib o‘tishi e’lon qilindi. Terma jamoamiz Bahraynga bugun tunda uchib ketadi.

Eslatib o‘tamiz, Osiyo o‘yinlari futzal bahslari 2026 yili Senegal poytaxti Dakar shahrida bo‘lib o‘tadigan IV Yozgi Yoshlar Olimpiadasi uchun saralash musobaqasi vazifasini o‘tab beradi.