Икки кундирки, сайёрамизнинг энг катта қуруқликка эга ҳудуди — Осиё спорт мухлисларининг диққат-эътибори Баҳрайн мамлакатига қаратилган. Баҳрайн қироллиги қитъа ёшларининг энг йирик спорт анжумани — III Осиё ёшлар ўйинларига старт берилди. Спортнинг 28 йўналиши бўйича қитъамизнинг энг кучли, иқтидорли ёшлари қарийб икки ҳафта мобайнида ғолиблик учун баҳс олиб боришади.
Осиё ўйинларининг футзал турида мамлакатимиз шарафини ҳимоя этадиган Ўзбекистон ўсмирлар терма жамоаси “А” гуруҳида мусобақа мезбони — Баҳрайн, шунингдек, Афғонистон ҳамда Хитой терма жамоаларига қарши майдонга чиқади. Дастлабки учрашув 24 октябрь санасида Афғонистон терма жамоасига қарши бўлиб ўтади.
Осиё ўйинлари дастуридан ўрин олган футзал баҳслари Баҳрайн мамлакатининг шимолий қисмида жойлашган Иса Таун шаҳридаги 3600 томошабинга мўлжалланган “Халифа спорт сити” мажмуасида бўлиб ўтиши эълон қилинди. Терма жамоамиз Баҳрайнга бугун тунда учиб кетади.
Эслатиб ўтамиз, Осиё ўйинлари футзал баҳслари 2026 йили Сенегал пойтахти Дакар шаҳрида бўлиб ўтадиган IV Ёзги Ёшлар Олимпиадаси учун саралаш мусобақаси вазифасини ўтаб беради.
