Kataloniya nashri E-Notíciesning xabar berishicha, «Barselona» jamoasi himoyachisi Alexandro Balde «Manchester Siti»ning transfer ro‘yxatiga kiritilgan.

Manba ma’lumotlariga ko‘ra, Balde xizmatlariga shaxsan «shaharliklar» bosh murabbiyi Xosep Gvardiola qiziqish bildirgan. U ushbu masala yuzasidan «Barselona» sport direktori Deku bilan muloqot olib borgan.

Ma’lumot uchun, 2023 yili ham «Manchester Siti» Baldeni sotib olishga harakat qilgan, ammo kataloniyaliklar taklifni rad etgan edi.

Hozirgi paytda transfer amalga oshishi juda kam ehtimolli deb baholanmoqda, chunki «Barselona»ning moliyaviy ahvoli barqarorlashgan va Balde jamoaning asosiy yetakchilaridan biriga aylangan.

Shu bilan birga, Gvardiola o‘z uslubiga mos himoyachi sifatida Baldeni ideal nomzod deb hisoblaydi va u uchun kurashni to‘xtatmoqchi emas.

Ma’lumot uchun: 21 yoshli ispan himoyachining «Barselona» bilan tuzgan shartnomasi 2028 yilgacha amal qiladi. Transfermarkt portali ma’lumotlariga ko‘ra, uning bozor qiymati 60 million yevroga teng.