«Vilyarreal» klubi o‘zining rasmiy saytida 17-tur doirasida AQSHda «Barselona»ga qarshi bo‘lib o‘tishi kerak bo‘lgan o‘yin bekor qilingani munosabati bilan La Liga qarorini qattiq tanqid qildi. Ushbu bellashuv 20 dekabr kuni bo‘lib o‘tishi rejalashtirilgan edi.

Klub bayonotida shunday deyiladi:

«Vilyarreal» AQSHda «Barselona»ga qarshi bo‘lib o‘tishi kerak bo‘lgan uchrashuvni tashkil etishda La Liga faoliyatidan qattiq norozilik bildiradi. Klub 20 dekabr kuni Mayamida o‘tkazilishi kerak bo‘lgan 17-tur bahsini tayyorlash jarayonida La Liga ishidan qattiq xafsalasi pir bo‘lganini ma’lum qiladi.

Bayonotda ta’kidlanishicha, klub prezidenti Fernando Royg va bosh direktor Fernando Royg Negeroles bu mavzu haqida joriy mavsumda bir necha marta matbuot anjumanlarida fikr bildirgan. Ular ta’kidlashicha, klub ushbu masaladagi voqealar xronologiyasini yodga solishni zarur deb hisoblaydi.

Matchni Ispaniyadan tashqarida o‘tkazish tashabbusi La Liga rahbariyatining chempionatni global rivojlantirish strategiyasi doirasida ilgari surilgan. Yoz faslida La Liga «Vilyarreal»ga «Barselona»ga qarshi o‘yinni mehmon sifatida emas, balki mezbon sifatida o‘tkazishni taklif etgan. «Vilyarreal» bu taklifni jamoa rivoji va musobaqa nufuzi uchun foydali deb topib, qabul qilgan.

Klub La Liga taklifini ikki shart bilan qabul qilgan:

1. Abonement egalariga yetkazilgan zarar uchun kompensasiya to‘lanishi.
2. Hech bir klub bevosita moliyaviy foyda olmasligi.

La Liga bu shartlarga rozi bo‘lgan va tayyorgarlik jarayonida klub bilan yaqin hamkorlik qilgan. Biroq safar va tashkilotchilik bo‘yicha aniqlik bo‘lmagani sababli, «Vilyarreal» bir necha marta vaziyatga oydinlik kiritishni talab qilgan va savollar yechilmasa, loyihadan chiqishga tayyor ekanini bildirgan.

Bayonotda aytilishicha, kecha, 21 oktyabr kuni, klubga La Liga tomonidan telefon orqali o‘yin AQSHda o‘tkazilmasligi ma’lum qilingan. Shu bilan birga, bu ma’lumot maxfiy tarzda berilgan bo‘lsa-da, oradan bir necha daqiqa o‘tib La Liga o‘zi bu haqda rasman bayonot bergan. «Vilyarreal» buni hurmatsizlik va loyiha boshqaruvidagi jiddiy xatolik deb baholagan.

«Klub xalqaro rivojlanish imkoniyatini yo‘qotganidan afsusda, ammo jamoa va musobaqa manfaatlarini himoya qilish yo‘lida ishni davom ettiradi», — deyiladi «sariq suvosti kemasi» bayonotida.

Eslatib o‘tamiz, La Liga 9-turida jamoalar belgilangan o‘yinni xorijda o‘tkazish rejasiga qarshi norozilik belgisi sifatida o‘yin boshida bir necha soniya harakatsiz qolishgan edi. Shu voqealardan so‘ng La Liga AQSHdagi bellashuvni rasman bekor qildi.