Turkiyaning “Bandirma Sanayispor” klubi darvozaboni O‘g‘uzxon Kamaji mashg‘ulot paytida yurak xurujiga uchrab, 21 oktyabr kuni 28 yoshida vafot etdi. Bu haqda Haberturk nashri xabar berdi.

Ma’lum qilinishicha, mashg‘ulot vaqtida futbolchining ahvoli to‘satdan yomonlashgan. Unga darhol birinchi tibbiy yordam ko‘rsatilgan, so‘ngra Bandirma shahridagi kasalxonaga yetkazilgan, biroq shifokorlar uning hayotini saqlab qola olishmagan.

Aniq o‘lim sababini aniqlash uchun Kamajining jasadi Bursa shahridagi sud-tibbiyot institutiga yuborildi. Dastlabki ma’lumotlarga ko‘ra, futbolchi yurak xurujidan vafot etgan.

Manbaga ko‘ra, Kamaji 21 oktyabr kuni kardiolog ko‘rigiga yozilgan edi. U so‘nggi o‘yinlarning birida o‘zini yomon his qilgani ortidan shifokorga bormoqchi bo‘lgan.

Ma’lumot uchun, “Bandirma Sanayispor” klubi Turkiya 1-havaskorlar ligasida o‘ynaydi. Jamoaning 27 oktyabr, dushanba kuniga belgilangan “Go‘nen” klubiga qarshi o‘yini bekor qilingan.