Jurnalist Devid Ornshteynning yozishicha, "Arsenal" 15 yoshli hujumkor yarim himoyachi Maks Douman bilan ilk shartnomasi shartlarini imzolash borasida kelishuvga erishgan. U 17 yoshga to‘lganida professional shartnoma ham imzolashi kutilmoqda.
Angliyalik futbolchiga yaxshiroq takliflar bo‘lishi mumkin edi, chunki u dunyoning ko‘plab yetakchi klublari e’tiboriga tushgandi, ammo "Arsenal" muxlislari oilasidan bo‘lgan va otasi muzokaralar olib borgan Douman faoliyatini "Emireyts"da davom ettirishga qaror qildi. 31 dekabr kuni Douman 16 yoshga to‘lganidan so‘ng, "Arsenal" unga 17 yoshga to‘lgan kuni kuchga kiradigan birinchi professional shartnomani taklif qilishi mumkin bo‘ladi.
Douman bu mavsumda Angliya va Yevropaning eng umidli futbolchilaridan biriga aylandi. U APLdagi debyutini avgust oyida "Lids"ga qarshi o‘yinda 15 yoshu 235 kunligida o‘tkazgan. Umuman olganda, u joriy mavsumda "Arsenal"ning asosiy jamoasi safida barcha musobaqalarda uchta o‘yinda maydonga tushdi.
