Fransiyalik mutaxassis Zinedin Zidan Turinning “Yuventus” klubi bosh murabbiyiga aylanishi mumkin. Bu haqda Fichajes nashri xabar berdi.

Turin klubi ketma-ket 8 ta o‘yindan beri g‘alaba qozona olmayapti (5 ta durang, 3 ta mag‘lubiyat). Mazkur natijalar ortidan “Yuventus” rahbariyati xorvatiyalik mutaxassis Igor Tudor bilan shartnomani muddatidan oldin bekor qildi. Hozirda uning o‘rniga asosiy nomzod sifatida Zidan ko‘rsatilmoqda.

Zidanning nomzodi bir nechta omillar asosida tanlangan: uning futbolda obro‘-e’tibor qozongan shaxs ekani, tajribasi va yetuk futbolchilar bilan ishlashdagi mahorati bunga sabab bo‘lgan. “Real Madrid” bilan erishgan yutuqlari esa uning murabbiylik salohiyatini tasdiqlaydi.

Avvalroq OAVda Zidan Fransiya terma jamoasini boshqarishni istayotgani, shuning uchun klublardan kelayotgani takliflarni ko‘rib chiqmayotgani haqida xabarlar tarqalgan edi.  

Eslatib o‘tamiz, Zinedin Zidan bungacha ikki bor Madridning “Real” klubiga bosh murabbiylik qilgan (2016–2018 va 2019–2021 yillar oralig‘ida). Ushbu davr mobaynida u jamoa bilan uch marta UYEFA Chempionlar Ligasi, ikki marta La Liga chempionligi va ikki bor Ispaniya Superkubogi g‘olibligini qo‘lga kiritgan.