"Tottenxem" markaziy himoyachisi Mikki van de Ven Madridning "Real" klubiga o‘tishi mumkin. Bu haqda TEAMtalk xabar bermoqda.
"Qaymoqranglilar" safida markaziy himoyachini tekinga qo‘lga kiritish variantlari ko‘rib chiqilayotganiga qaramay, klub van de Venga bo‘lgan qiziqishni saqlab qolmoqda. Biroq, "Real" niderlandiyalik futbolchini qo‘lga kiritish oson bo‘lmasligini tushunmoqda, chunki 2023 yilda "shporlar" uning uchun deyarli 50 million yevro sarflagan.
Joriy mavsumda 24 yoshli van de Ven barcha musobaqalarda 13 ta o‘yinda maydonga tushib, beshta gol urdi. Futbolchining London jamoasi bilan shartnomasi 2029 yilning yozigacha mo‘ljallangan.
