"Тоттенхэм" марказий ҳимоячиси Микки ван де Вен Мадриднинг "Реал" клубига ўтиши мумкин. Бу ҳақда TEAMtalk хабар бермоқда.
"Қаймоқранглилар" сафида марказий ҳимоячини текинга қўлга киритиш вариантлари кўриб чиқилаётганига қарамай, клуб ван де Венга бўлган қизиқишни сақлаб қолмоқда. Бироқ, "Реал" нидерландиялик футболчини қўлга киритиш осон бўлмаслигини тушунмоқда, чунки 2023 йилда "шпорлар" унинг учун деярли 50 миллион евро сарфлаган.
Жорий мавсумда 24 ёшли ван де Вен барча мусобақаларда 13 та ўйинда майдонга тушиб, бешта гол урди. Футболчининг Лондон жамоаси билан шартномаси 2029 йилнинг ёзигача мўлжалланган.
