Jahon chempionatiga tayyorgarlik ko‘rayotgan O‘zbekiston U-17 terma jamoasi BAAdagi yig‘ini doirasida so‘nggi o‘rtoqlik uchrashuvini o‘tkazdi. Islom Ismoilov shogirdlariga Burkina-Faso o‘smirlari raqiblik qildi. Bahs tomonlarning kelishuviga ko‘ra yopiq eshiklar ortida o‘tkazildi.
O‘yin yuqori sur’atda boshlandi. Biroq afrikalik futbolchilar ilk daqiqalardanyoq faol harakat qilib, 16-daqiqada Zalle Ismoil hisobni ochdi. 28-daqiqada Zongo Muhammad ikkinchi golni urdi va birinchi bo‘lim shunday natija bilan yakunlandi — 0:2.
Ikkinchi bo‘lim boshida Islom Ismoilov shogirdlari bir qator almashinuvlar amalga oshirishdi — Erimbetov va Abdumuminov o‘rniga Turg‘unov hamda Aliyev maydonga tushirildi.
60-daqiqada yana ikki o‘zgarish bo‘ldi: Habibullayev va Sodiqov o‘rniga Saidmurodov va Muradov o‘yinga qo‘shildi. Biroq 63-daqiqada Alassana Bagayogo jamoamiz darvozasiga uchinchi golni kiritdi.
76-daqiqada Anvarov o‘rnini Rustamov egalladi, ammo 83-daqiqada Zongo Muhammad dublini rasmiylashtirib, hisobni 0:4 ko‘rinishga keltirdi.
O‘rtoqlik o‘yini
O‘zbekiston U17 - Burkina-Faso U17 - 0:4
Gollar: Zalle Ismoil (16’), Zongo Muhammad (28’, 83’), Alassana Bagayogo (63’)













