Жаҳон чемпионатига тайёргарлик кўраётган Ўзбекистон U-17 терма жамоаси БААдаги йиғини доирасида сўнгги ўртоқлик учрашувини ўтказди. Ислом Исмоилов шогирдларига Буркина-Фасо ўсмирлари рақиблик қилди. Баҳс томонларнинг келишувига кўра ёпиқ эшиклар ортида ўтказилди.

Ўйин юқори суръатда бошланди. Бироқ африкалик футболчилар илк дақиқаларданёқ фаол ҳаракат қилиб, 16-дақиқада Залле Исмоил ҳисобни очди. 28-дақиқада Зонго Муҳаммад иккинчи голни урди ва биринчи бўлим шундай натижа билан якунланди — 0:2.

Иккинчи бўлим бошида Ислом Исмоилов шогирдлари бир қатор алмашинувлар амалга оширишди — Эримбетов ва Абдумуминов ўрнига Турғунов ҳамда Алиев майдонга туширилди.

60-дақиқада яна икки ўзгариш бўлди: Ҳабибуллаев ва Содиқов ўрнига Саидмуродов ва Мурадов ўйинга қўшилди. Бироқ 63-дақиқада Алассана Багаёго жамоамиз дарвозасига учинчи голни киритди.

76-дақиқада Анваров ўрнини Рустамов эгаллади, аммо 83-дақиқада Зонго Муҳаммад дублини расмийлаштириб, ҳисобни 0:4 кўринишга келтирди.

Ўртоқлик ўйини
Ўзбекистон U17 - Буркина-Фасо U17 - 0:4
Голлар: Залле Исмоил (16’), Зонго Муҳаммад (28’, 83’), Алассана Багаёго (63’)