Bahrayn Qirolligi mezbonlik qilayotgan III Osiyo o‘smirlar o‘yinlari nihoyasiga yetmoqda. Musobaqaning so‘nggi bosqichida barcha sport turlari bo‘yicha g‘olib va sovrindorlar aniqlanmoqda.
Bugun sovrindorlarni aniqlash navbati futzal turiga yetib keldi — dastlab bronza medali egalari nomi ma’lum bo‘ladi, shundan so‘ng final uchrashuvi o‘tkaziladi.
O‘zbekiston o‘smirlar terma jamoasi bugun, Toshkent vaqti bilan soat 18:00 da, 3-o‘rin uchun bahsda Tailand terma jamoasiga qarshi maydonga tushadi. Yarim finalda tailandliklar Afg‘oniston jamoasiga 1:9 hisobida imkoniyatni boy bergan edi.
Bronza medali uchun kurashda jamoalarning imkoniyatlari deyarli teng. Kim himoyada ishonchli o‘yin ko‘rsatib, hujumda yaratilgan imkoniyatlardan unumli foydalansa, o‘z maqsadiga erishadi.
O‘zbekiston o‘smirlariga bugungi bahsda omad va g‘alaba tilaymiz!
Eslatma: Osiyo o‘smirlar o‘yinlarida sovrindor bo‘lgan jamoalar 2026 yilda Senegal poytaxti Dakar shahrida bo‘lib o‘tadigan IV Yoshlar Yozgi Olimpiadasiga yo‘llanmani qo‘lga kiritishadi.













