Rotterdamning "Feyenoord" klubi sharafini himoya qilayotgan 19 yoshli niderlandiyalik himoyachi Jivayro Rid Germaniya Bundesligasi grandi safiga o‘tish imkoniyatiga ega.
Jurnalist Florian Plettenbergning ma’lum qilishicha, futbolchini Myunxenning "Bavariya" klubi o‘z safiga qo‘shib olmoqchi. Tomonlar Rid transferi bo‘yicha dastlabki muzokaralarni boshlab yuborgan. Shuningdek, himoyachi transferiga Angliya klublari ham qiziqish bildirmoqda.
Jivayroning "Feyenoord" bilan shartnomasi 2029 yilning yarmigacha mo‘ljallangan. Uning bozor narxi 20 million yevroni tashkil etadi.
Joriy mavsumda himoyachi 12 ta o‘yin o‘tkazib, 1 ta gol va 1 ta golli uzatmani o‘z hisobiga yozdirib qo‘ydi.
