«PSJ» hujumchisi Usmon Dembele Chempionlar ligasi 4-turida «Bavariya»ga qarshi bahsni o‘tkazib yuborishi mumkin.
Parijliklar seshanba kuni myunxenliklarni qabul qiladi. Avvalroq sonidan olgan jarohati tufayli bir oyni o‘tkazib yuborgan parijliklar vingeri shanba kuni bo‘lib o‘tgan «Nissa»ga qarshi bahsda (1:0) o‘sha jarohatini qaytalab oldi.
L’Équipe xabar berishicha, fransuz futbolchi o‘sha kuni sonida og‘riq his qilgani uchun asosiy tarkibda maydonga tushmagan. U 72-daqiqada zaxiradan o‘yinga qo‘shilgan. G‘alabani jamoadoshlari bilan nishonlar ekan, u o‘ng sonining orqa qismiga qo‘l tekkazdi va og‘riqni his qildi.
Ligue 1+ videoyozuvlarida Dembele jamoadoshi Ashraf Hakimiyga murojaat qilib shunday degani eshitiladi: «Sonim og‘riyapti. Juda og‘riyapti».
