Superliganing 27-turidan o‘rin olgan "Mash’al" — "Qo‘qon-1912" (1:0) uchrashuvidan keyin mehmonlar ustozi Bahrom Haydarov o‘z fikrlarini bildirib o‘tdi.

— Turnir jadvalida bir-biriga yaqin jamoalar to‘qnash kelishdi. O‘ylaymanki, teng o‘yin bo‘ldi. Ikkala jamoaga ham ochko juda zarur edi, shu bois maydonda ko‘p kurash bo‘ldi. Boshida o‘yinni yaxshi boshladik, nazorat qilayotgan edik. Bunchalik oson gol o‘tkazib yubormasligimiz kerak edi. Hisobda ortda qolishni boshlagach, jamoamizda asabiylik paydo bo‘ldi va oddiy vaziyatlarda sovuqqonlik yetishmadi. Bizda ham vaziyatlar bo‘ldi, Hasanovda, Dasida. Agar o‘sha vaziyatlardan foydalanganimizda o‘yin boshqacha bo‘lardi. Teng o‘yin bo‘ldi. "Mash’al"ni g‘alaba bilan tabriklayman", — dedi Bahrom Haydarov.
 
— Hakamlarga nisbatan ko‘p bor e’tiroz bildirdingiz. Aynan qaysi vaziyatlarga nisbatan e’tiroz bo‘ldi?
— O‘yin paytida baribir qizishib ketish bo‘ladi. Hasanov yiqilgan paytda penalti so‘radim. Hakam o‘z qarorini tushuntirdi va bizda boshqa e’tiroz bo‘lmadi. Oldimizda 3 ta o‘yin bor va nasib qilsa oldimizga qo‘yilgan vazifani bajaramiz.