«Milan» hujumchisi Rafael Leau «Roma» ustidan qozonilgan minimal g‘alabadan so‘ng o‘z fikrlarini bildirdi.
«Rossonerilar» A Seriyaning 10-turidagi uchrashuvda yagona golni 39-daqiqada Straxinya Pavlovich orqali urdi — bu golga aynan Leauning uzatmasi sabab bo‘ldi.
«Mening vazifam — jamoa uchun ishlash, individual mahoratini namoyish qilish emas. Bu eng muhim narsa. Biz hech qachon taslim bo‘lmaymiz. Menyanning seyvi o‘yinda hal qiluvchi lahza bo‘ldi. Biz g‘alabani saqlab qolishimizga ishongan edik va shunday ham bo‘ldi. Bugun golli vaziyatlarda raqibdan ustun bo‘ldik, shuning uchun juda xursandmiz», — dedi portugaliyalik hujumchi DAZNga bergan intervyusida.
«Milan» A Seriya jadvalida uchinchi o‘rinni egallab turibdi va yetakchi «Napoli»dan bor-yo‘g‘i bir ochkoga ortda qolmoqda.
