«Manchester Siti» hujumchisi Erling Xoland raqib darvozalariga gol urishni to‘xtatmayapti. Yaqindagi «Bornmut»ga qarshi bahsda (3:1) norvegiyalik forvard ikki bor raqib darvozasini ishg‘ol etdi — 17- va 33-daqiqalarda.
Joriy mavsumda Xolandning hisobida Angliya Premyer-ligasida 13 ta gol bor. Bu paytga qadar «shaharliklar» umumiy hisobda 20 gol urgan, ya’ni jamoa gollarining 65 foizi aynan Xoland hissasiga to‘g‘ri keladi. Bu ko‘rsatkich ligadagi eng yuqori natija hisoblanadi.
Ikkinchi o‘rinni «Kristal Pelas» futbolchisi Jan-Filipp Mateta va «Brentford» hujumchisi Igor Tyago bo‘lishmoqda — har biri o‘z jamoasi gollarining 43 foiziga hissa qo‘shgan.
«Manchester Siti» 19 ochko bilan APL jadvalida ikkinchi o‘rinda boryapti, yetakchi «Arsenal»dan esa 6 ochko orqada.
