«Манчестер Сити» ҳужумчиси Эрлинг Холанд рақиб дарвозаларига гол уришни тўхтатмаяпти. Яқиндаги «Борнмут»га қарши баҳсда (3:1) норвегиялик форвард икки бор рақиб дарвозасини ишғол этди — 17- ва 33-дақиқаларда.
Жорий мавсумда Холанднинг ҳисобида Англия Премьер-лигасида 13 та гол бор. Бу пайтга қадар «шаҳарликлар» умумий ҳисобда 20 гол урган, яъни жамоа голларининг 65 фоизи айнан Холанд ҳиссасига тўғри келади. Бу кўрсаткич лигадаги энг юқори натижа ҳисобланади.
Иккинчи ўринни «Кристал Пэлас» футболчиси Жан-Филипп Матета ва «Брентфорд» ҳужумчиси Игор Тьяго бўлишмоқда — ҳар бири ўз жамоаси голларининг 43 фоизига ҳисса қўшган.
«Манчестер Сити» 19 очко билан АПЛ жадвалида иккинчи ўринда боряпти, етакчи «Арсенал»дан эса 6 очко орқада.
