«Tottenxem»ning braziliyalik hujumchisi Risharlison jamoani tark etishga tayyor. Bu haqda jurnalist Ekrem Konur xabar berdi.
Manba ma’lumotlariga ko‘ra, 28 yoshli futbolchiga mos taklif bo‘lsa, u qishki transfer oynasida jamoasini o‘zgartirishi mumkin. Eng jiddiy qiziqishni uning vatanidagi «Flamengo» klubi bildirmoqda. Shuningdek, «Everton», «Orlando Siti» va bir nechta Saudiya klublari ham Risharlison bilan shartnoma tuzish niyatida.
Risharlison 2022 yilda «Tottenxem» tarkibiga qo‘shilgan edi. Joriy mavsumda u barcha musobaqalarda 16 ta o‘yinda 3 ta gol urdi va 2 ta assist qayd etdi.
Transfermarkt ma’lumotlariga ko‘ra, hujumchining bozor qiymati 25 million yevroni tashkil qiladi.
