Mamlakat milliy chempionati – Oliy liga jamoalarining 5-tur uchrashuvlari joriy yilning 17 – 22 noyabr kunlari Buxoro shahrida bo‘lib o‘tadi. Turga 2024 yilgi Jahon chempionati o‘yinlarini qabul qilgan muhtashan «Universal» sport majmuasi mezbonlik qiladi.
Mazkur tur Oliy ligada ikkinchi davra o‘yinlarini boshlab beradi. Birinchi davradan keyin ishtirokchilarda yo‘l qoyilgan xato va kamchiliklar ustida ishlash, ikkinchi davraga puxta tayyorgarlik ko‘rish uchun yetarlicha vaqt, imkoniyat bo‘ldi. Shu ma’noda 5-turda biz yana keskin raqobat, hujumkor va sermahsul o‘yinlar guvohi bo‘lamiz, degan umiddamiz.
5-turning har bir o‘yin kunida muxlislarni o‘ziga tortuvchi uchrashuvlar bor. Turning eng qiziqarli o‘yini esa shubhasiz, karvonboshi — BMB PFS jamoasi hamda uning eng yaqin ta’qibchisi — “Oil Star” o‘rtasidagi uchrashuv bo‘ladi. Shu ma’noda buxorolik futzal ishqibozlari hamda qadimiy va hamisha navqiron Buxoro shahri mehmonlariga Oliy liganing 5-tur uchrashuvlarini o‘tkazib yubormasligini maslahat beramiz.
O‘FF hamda «Sport» ijodiy birlashmasining o‘zaro kelishuviga muvofiq 5-turning barcha o‘yinlarni «Sport-TV» va «Futbol-TV» telekanallarida, shuningdek, O‘zbekiston futzal federasiyasining You Tube kanali orqali to‘g‘ridan to‘g‘ri, jonli tarzda efirga uzatiladi. Bundan tashqari, muxlislarimiz uchun Telegram kanalimiz orqali ham jonli, matnli translyasiyalar berib boramiz.
Biz bilan birga bo‘ling, bizdan uzoqlashmang!
