Мамлакат миллий чемпионати – Олий лига жамоаларининг 5-тур учрашувлари жорий йилнинг 17 – 22 ноябрь кунлари Бухоро шаҳрида бўлиб ўтади. Турга 2024 йилги Жаҳон чемпионати ўйинларини қабул қилган муҳташан «Универсал» спорт мажмуаси мезбонлик қилади.

Мазкур тур Олий лигада иккинчи давра ўйинларини бошлаб беради. Биринчи даврадан кейин иштирокчиларда йўл қойилган хато ва камчиликлар устида ишлаш, иккинчи даврага пухта тайёргарлик кўриш учун етарлича вақт, имконият бўлди. Шу маънода 5-турда биз яна кескин рақобат, ҳужумкор ва сермаҳсул ўйинлар гувоҳи бўламиз, деган умиддамиз.

5-турнинг ҳар бир ўйин кунида мухлисларни ўзига тортувчи учрашувлар бор. Турнинг энг қизиқарли ўйини эса шубҳасиз, карвонбоши — БМБ ПФС жамоаси ҳамда унинг энг яқин таъқибчиси — “Оил Стар” ўртасидаги учрашув бўлади. Шу маънода бухоролик футзал ишқибозлари ҳамда қадимий ва ҳамиша навқирон Бухоро шаҳри меҳмонларига Олий лиганинг 5-тур учрашувларини ўтказиб юбормаслигини маслаҳат берамиз.

ЎФФ ҳамда «Спорт» ижодий бирлашмасининг ўзаро келишувига мувофиқ 5-турнинг барча ўйинларни «Спорт-ТВ» ва «Футбол-ТВ» телеканалларида, шунингдек, Ўзбекистон футзал федерациясининг Ёу Тубе канали орқали тўғридан тўғри, жонли тарзда эфирга узатилади. Бундан ташқари, мухлисларимиз учун Телеграм каналимиз орқали ҳам жонли, матнли трансляциялар бериб борамиз.

Биз билан бирга бўлинг, биздан узоқлашманг!