U-17 jahon chempionatida o‘z ishtirokini boshlagan O‘zbekiston terma jamoasi musobaqadagi ilk bahsini g‘alaba bilan yakunladi. Yigitlarimiz guruh bosqichining birinchi turida Paragvay termasiga qarshi maydonga tushib, 2:1 hisobida zafar qozonishdi.

Uchrashuv Toshkent vaqti bilan soat 18:00 da start oldi va boshidanoq o‘zbek yoshlari faol o‘yin namoyish etishdi. Birinchi bo‘limning 25-daqiqasida terma jamoamizning yetakchi hujumchisi Azizbek Abdumo‘minov hisobni ochdi — u olis masofadan raqib darvozasini ishg‘ol etdi.

Tanaffus arafasida, 45+1-daqiqada shu o‘sha Abdumo‘minov yana bir bor sahna markaziga chiqdi. Qanotdan yetkazib berilgan to‘pni Azizbek raqib jarima maydoni ichidan darvozaga joylab qo‘ydi hamda dubl muallifiga aylandi. Bu goldan keyin yigitlarimiz ruhan ustunlikni qo‘lga kiritishdi va birinchi bo‘limni 2:0 hisobida yakunlashdi.

Ikkinchi bo‘limda Islom Ismoilov shogirdlari o‘z hisobdan kelib chiqib, taktik jihatdan to‘g‘ri harakat qilishdi. Shuga qaramay, 89-daqiqada Paragvay jamoasi penaltidan hisobni qisqartirishga muvaffaq bo‘ldi — Alan Ledesma aniq zarba berdi. Biroq bu gol bahs natijasiga ta’sir qilmadi — uchrashuv O‘zbekistonning g‘alabasi bilan yakunlandi.

O‘zbekiston keyingi bahsni 8 noyabr kuni Irlandiyaga qarshi o‘tkazadi. Yevropaliklar bugun Panamani 5:1 hisobida mag‘lub etib, guruh peshqadami bo‘lib olishdi.

U-17 JCH. "J" guruhi, 1-tur
Paragvay — O‘zbekiston 1:2
Gollar: Ledesma (89’, pen.) — Abdumo‘minov (25’, 45+1’)