U-17 жаҳон чемпионатида ўз иштирокини бошлаган Ўзбекистон терма жамоаси мусобақадаги илк баҳсини ғалаба билан якунлади. Йигитларимиз гуруҳ босқичининг биринчи турида Парагвай термасига қарши майдонга тушиб, 2:1 ҳисобида зафар қозонишди.

Учрашув Тошкент вақти билан соат 18:00 да старт олди ва бошиданоқ ўзбек ёшлари фаол ўйин намойиш этишди. Биринчи бўлимнинг 25-дақиқасида терма жамоамизнинг етакчи ҳужумчиси Азизбек Абдумўминов ҳисобни очди — у олис масофадан рақиб дарвозасини ишғол этди.

Танаффус арафасида, 45+1-дақиқада шу ўша Абдумўминов яна бир бор саҳна марказига чиқди. Қанотдан етказиб берилган тўпни Азизбек рақиб жарима майдони ичидан дарвозага жойлаб қўйди ҳамда дубл муаллифига айланди. Бу голдан кейин йигитларимиз руҳан устунликни қўлга киритишди ва биринчи бўлимни 2:0 ҳисобида якунлашди.

Иккинчи бўлимда Ислом Исмоилов шогирдлари ўз ҳисобдан келиб чиқиб, тактик жиҳатдан тўғри ҳаракат қилишди. Шуга қарамай, 89-дақиқада Парагвай жамоаси пенальтидан ҳисобни қисқартиришга муваффақ бўлди — Алан Ледесма аниқ зарба берди. Бироқ бу гол баҳс натижасига таъсир қилмади — учрашув Ўзбекистоннинг ғалабаси билан якунланди.

Ўзбекистон кейинги баҳсни 8 ноябрь куни Ирландияга қарши ўтказади. Европаликлар бугун Панамани 5:1 ҳисобида мағлуб этиб, гуруҳ пешқадами бўлиб олишди.

U-17 ЖЧ. "J" гуруҳи, 1-тур
Парагвай — Ўзбекистон 1:2
Голлар: Ледесма (89’, пен.) — Абдумўминов (25’, 45+1’)