Saudiya Arabistoni poytaxti Ar-Riyod shahrida bo‘lib o‘tayotgan VI Islom birdamligi o‘yinlari doirasidagi futzal musobaqalari hal qiluvchi bosqichga yetdi. Bugun guruh bosqichi bahslari yakunlanib, yarim finalga yo‘l olgan jamoalar nomi ma’lum bo‘ldi.

O‘zbekiston milliy terma jamoasi dastlabki ikki uchrashuvda g‘alaba qozonib, muddatidan oldin yarim final yo‘llanmasini qo‘lga kiritgandi. Nodir Eliboyev shogirdlari guruhdagi uchinchi bahsda ham irodali o‘yin namoyish etishdi. Liviya terma jamoasiga qarshi uchrashuvda 0:2 hisobida ortda borayotgan bir paytda jamoamiz sardori Mashrab Odilov hisobni qisqartirdi. Oradan ko‘p o‘tmay Muhammadali Husanboyev ikkinchi golni kiritib, jamoamizga navbatdagi ochkoni taqdim etdi – 2:2.

Hozirgina guruhning so‘nggi uchrashuvida musobaqa mezbonlari – Saudiya Arabistoni terma jamoasi 2017 yilgi Islom birdamligi o‘yinlari mezboni – Ozarbayjon ustidan g‘alaba qozonib (5:0), «A» guruhidan yarim finalga ikkinchi yo‘llanmani rasmiylashtirdi.

«B» guruhida esa kutilmagan natijalar qayd etilmadi. Marokash terma jamoasi Afg‘onistonni 4:0 hisobida dog‘da qoldirib, birinchi o‘rinni egalladi. Eron esa Tojikiston ustidan 4:1 hisobida zafar quchdi.

Shu tariqa, yarim final juftliklari quyidagicha shakllandi:

9 noyabr, soat 18:00 — O‘zbekiston – Eron
9 noyabr, soat 21:00 — Marokash – Saudiya Arabistoni

Bir kunlik tanaffusdan so‘ng, 11 noyabr kuni VI Islom birdamligi o‘yinlarining g‘olib va sovrindor jamoalari nomi ma’lum bo‘ladi.