"Barselona" prezidenti Joan Laporta qanot hujumchisi Lamin Yamalning turmush tarzi haqida qayg‘urmasligini aytdi.

Avvalroq 18 yoshli futbolchi noyabr oyida Gruziya va Turkiyaga qarshi o‘yinlarni o‘tkazib yuborishi e’lon qilingan edi.

Yamal haqida

"18 yoshida u hayotdan zavqlanmoqda; u o‘z yoshiga nisbatan juda yetuk. Men uning turmush tarzi haqida umuman qayg‘urmayman. U himoya va qo‘llab-quvvatlashga muhtoj: bizdan va atrofdagilardan.

U ko‘plab qiyinchiliklarga duch keldi va ularning barchasini juda yaxshi yengib o‘tmoqda. U professional va boshqalardan ko‘ra ko‘proq mashq qiladi.

Uning chov sohasidagi muammosi bor va u reabilitasiyadan o‘tganiga qaramay, o‘ynashda davom etayotgani maqtovga sazovor. Bu uning "Barselona"ga sodiqligi va fidoyiligini namoyish etadi.

Lamin daho va biz uning rivojlanishiga oqilona yo‘l ko‘rsatishimiz kerak. U hali o‘zining eng yuqori cho‘qqisiga chiqmagan. Yamal o‘z pozisiyasida dunyodagi eng yaxshi o‘yinchi".

Laminning jarohati va federasiyaga xabar bermasdan bajarilgan prosedura haqida

"Biz buni bilishimiz bilanoq ularga xabar berdik. Shifokor bizga 10 kunlik dam olish kerakligini aytganda, biz milliy terma jamoaga xabar berdik. Biz barchaga hurmat bilan qaraymiz va bahslashmaymiz.

Biz o‘yinchilarimizni to‘g‘ri sur’atda tiklashga harakat qilmoqdamiz. Bu shifokor haqiqiy mutaxassis; u dushanba kuni keldi, Laminni tekshirdi va bizga davolash rejasini tushuntirdi va hamma narsa yaxshi o‘tdi. Biz Yamalning jamoa bilan birga bo‘lishini istaymiz.

Bu tanaffus milliy terma jamoaning safardagi o‘yinlariga to‘g‘ri keldi, ammo menimcha, bu jamoaning 2026-yilgi Jahon chempionati finaliga chiqish imkoniyatlariga ta’sir qilmaydi, chunki ular allaqachon muvaffaqiyatga erishish yo‘lida. Biz "Barselona" manfaatlari yo‘lida nima qilishimiz kerak bo‘lsa, shuni qilamiz", dedi Laporta.