"Liverpul" va Vengriya terma jamoasi yarim himoyachisi Dominik Soboslai irlandiyaliklarning ayblovlariga javob qaytardi. Soboslai Irlandiyaga qarshi o‘yindan keyin tanqidlarga uchradi. Vengriya ikkinchi golni urib, 2:1 hisobida oldinga chiqib olganida, Dominik raqiblarini ko‘z yoshlarini artishga chaqirayotgandek ishora qilgandi.
Vengriya o‘z maydonida Irlandiyaga 2:3 hisobida mag‘lub bo‘ldi va Jahon chempionati chiptasi uchun pley-off o‘yinlarisiz qoldi. O‘tish o‘yinlarida irlandlar ishtirok etadi.
"Hozirgacha bo‘lib o‘tgan voqealarni qabul qilish qiyin. Afsuski, biz bu bilan yashashimiz va oldinga siljishimiz kerak. Golni nishonlash jamoamiz futbolchilari o‘rtasidagi hazil edi. Agar bu irlandiyaliklarga qaratilgan bo‘lsa, men ularga bu haqida aytgan bo‘lardim," - dedi Soboslai Blikk bilan suhbatda.
