"Ливерпуль" ва Венгрия терма жамоаси ярим ҳимоячиси Доминик Собослаи ирландияликларнинг айбловларига жавоб қайтарди. Собослаи Ирландияга қарши ўйиндан кейин танқидларга учради. Венгрия иккинчи голни уриб, 2:1 ҳисобида олдинга чиқиб олганида, Доминик рақибларини кўз ёшларини артишга чақираётгандек ишора қилганди.

Венгрия ўз майдонида Ирландияга 2:3 ҳисобида мағлуб бўлди ва Жаҳон чемпионати чиптаси учун плей-офф ўйинларисиз қолди. Ўтиш ўйинларида ирландлар иштирок этади.

"Ҳозиргача бўлиб ўтган воқеаларни қабул қилиш қийин. Афсуски, биз бу билан яшашимиз ва олдинга силжишимиз керак. Голни нишонлаш жамоамиз футболчилари ўртасидаги ҳазил эди. Агар бу ирландияликларга қаратилган бўлса, мен уларга бу ҳақида айтган бўлардим," - деди Собослаи Blikk билан суҳбатда.