"Andijon" - "Xorazm" (3:2) uchrashuvidan keyingi matbuot anjumanining birinchi qismida mehmonlar ustozi Hakim Fuzaylov qatnashdi va OAV vakillariinng savollariga javob qaytardi.
- Uchrashuv natijasidan bilsa bo‘ladiki, qiziqarli o‘yin bo‘ldi. Chempionatdagi 29-tur o‘yini o‘tkazildi. Doimgidek, uchrashuvni yaxshi boshladik, yaxshi harakat qildik. O‘yin davomida to‘pni yaxshi nazorat qildik. Afsuski, o‘tkazib yuborilgan uchta to‘pni o‘zimizga-o‘zimiz olib keldik. "Andijon" qarshi hujumlarda yaxshi o‘ynab, gollar urishga erishdi. Hech qanday imkoniyat qoldirmasdan uchta gol urdi. Gollar o‘tkazganimiz nima bilan bog‘liq? Mavsum oxiri, jarohat olganlar bor, shular bilan izohlayman. Tarkibda rotasiya bo‘ldi. Bundan hech qanday fojea yasab bo‘lmasligini ko‘rdik. Ikkinchi taymda yana futbolga qaytdik. Natijaga erishish mumkinligini isbotladik. Gol ura olishimizni, katta potensial bilan o‘ynashimiz mumkinligini ko‘rsatdik. Afsuski, navbatdagi mag‘lubiyatga uchradik. Shunday bo‘lsa-da, rahbariyatga jamoani Superligada saqlab qolishni va’da berganmiz. Chempionatdagi oxirgi o‘yinga tayyorgarlik ko‘ramiz va yaxshi o‘ynashga harakat qilamiz. Pley-off ham bo‘lishi mumkin va bunday jamoani saqlab qolishimiz kerak.
- Sardor Qobuljonov birinchi bo‘limda uchta gol o‘tkazib yubordi. Uni tanaffusdan keyin almashtirib yuborganingiz aynan o‘tkazilgan gollar bilan bog‘liqmi?
- Gap bunda emas. Futbolchi ancha muddat o‘ynamagandi. Mashg‘ulotlardagi harakatlari davomida u ancha yaxshi formadaligi ko‘ringandi. Murabbiylar shtabi bilan kelishib, uni maydonga tushirishga qaror qilgandik. Vaziyat shunday bo‘ldiki, 45 daqiqa ichida uchta to‘p o‘tkazib yuborganidan keyin biz Muhammajonovni maydonga tushirishga qaror qildik. O‘ylaymanki, to‘g‘ri qildik. Darvozabon uchun bir taymda uchta to‘p o‘tkazib yuborish yaxshi emas. Shu bois o‘zgarish qilishga harakat qildik.
- Vladimir Bubanya nega maydonga tushmadi?
- Nafaqat Bubanya, bundan tashqari o‘tgan safar maydondan chetlatilgan Abbos Otaxonov ham o‘yinni o‘tkazib yubordi. Bubanya haqida to‘xtaladigan bo‘lsam, u o‘zini yomon his qildi. Bir qancha eski jarohatlar o‘z ta’sirini ko‘rsatdi. Shu sababli 100 foizli o‘yinni ko‘rsata olmasdi. Hatto, o‘yin qaydnomasiga kiritilmagan o‘yinchilar ham bor. Jamoamizni keyingi o‘yinlarga tayyorlash asosiy vazifamiz hisoblanadi. Ayniqsa, jamoani pley-offga tayyorlash asosiy vazifamiz. Boshqalarga ham imkoniyat berishimiz kerak. Agar o‘yinchi o‘zini yomon his qilsa, uchrashuv muhim bo‘lsa ham maydonga tushmaydi. Mavsum tugayapti, buni tushunish lozim. Ba’zida charchoq alomatlari ham bo‘ladi. Buni natijasida o‘yinchi jarohat oladi.
