"Andijon" - "Xorazm" (3:2) uchrashuvidan keyingi matbuot anjumanining ikkinchi qismida mezbonlarning vaqtinchalik bosh murabbiyi Akmal Shorahmedov qatnashdi va OAV vakillarining savollariga javob qaytardi.
- O‘yin juda muhim edi. "Xorazm" uchun ham oxirgi imkoniyat edi. Shu bois uchrashuvni oldindan qiyin o‘tishini bilardik. Yarim himoyada muammolarimiz ko‘p edi. Ikkinchi taym shunaqa bo‘lishini ham bilardik. Men kamdan-kam o‘yindan qoniqaman. Yutgan bo‘lsak ham hali ishlaydigan ishlarimiz ko‘p. Muhimi, natija. Ammo Superligada qolish va Osiyo Chempionlar ligasida g‘alaba qozonish uchun bundan yaxshiroq o‘yin ko‘rsatishimiz kerak. Natijadan qoniqdim, o‘yindan qoniqmadim. Yigitlarga yechinish xonasida aytdim, bundan yaxshiroq o‘ynashimiz kerak. Kunimiz kam. Baribir "Arkadag"ga qarshi uchrashuvga yaxshiroq holatda chiqishga harakat qilamiz.
- Ikkinchi bo‘limda jamoa erta himoyaga o‘tdi. Shundan keyin ikkinchi gol o‘tkazildi. Oxirida esa Islom Mamatkazin tushirildi va 5 ta himoyachiga o‘tildi. Bunga munosabatingiz qanday?
- Ochiq aytishimiz kerak, hujumda kuchaytiradigan o‘yinchimiz yo‘q. Zaxirada yosh futbolchilar bor. Lekin meni fikrimcha, ular hozircha bizga yordam bera olmaydi. Baquvvat, jussasi katta futbolchilarga qarshi yosh yigitlarni tushirishdan ko‘ra 5 ta himoyachiga o‘tishni to‘g‘riroq deb o‘yladim. Oxirida natija uchun o‘ynadik, buni tan olamiz. Birinchi bo‘limda tezkor futbolchilarimiz o‘ynadi. Ikkinchi taymda tezkor yigitlarni almashtirganimizdan so‘ng o‘yinni berib qo‘ydik.
- Bektemir Abdumannonov doim qanot o‘yinchisi hisoblanadi. Bugungi uchrashuvda esa o‘rtada o‘ynadi. Bu aynan futbolchilarni yo‘qligi sabablimi?
- Faqat bu sabab emas. Jamoada yarim yildan beri ishlab kelyapman. O‘zim uni oldindan o‘rtada ham o‘ynatishni xohlardim. Bektemirni o‘zi ham biladi, undan o‘rtada o‘ynashni bilasanmi deb so‘raganimdla "Olimpik"da ham o‘rtada o‘ynaganini aytdi. Muhammadkarim Toirov to‘rtinchi sariq kartochkasi tufayli bu o‘yinni o‘tkazib yuborishi aniq bo‘lgach, ikki kun davomida Bektemirni markazda tayyorladik. Bizga o‘rtada tezkor, kreativ o‘yinchi kerak. Hujumni tezlashtiruvchi futbolchi sifatida uni tanladik. Menimcha, birinchi taymda ko‘proq foyda berdi. Bundan keyin ham uni o‘sha pozitsiyada o‘ynatamiz.
- 26 noyabr kuni "Andijon"ni "Arkadag"ga qarshi yana bir muhim o‘yin kutib turibdi. Yana durang bo‘lsa, jamoa guruhda qolib ketishi mumkin.
- Buni o‘zimiz ham bilamiz. Bugungi uchrashuvda ham tavakkal qilib uchta hujumchi bilan tushdik. Qayerdadir orqada ham tavakkal qildik. Lekin natijasini berdi. "Arkadag"ga qarshi boshqacha o‘yin sxemalarini o‘ylab qo‘yganmiz. Qo‘ldan kelganicha harakat qilamiz. Menimcha, "Arkadag" ham o‘yin borasida "Xorazm"dan u qadar kuchli emas. "Arkadag"da jismonan baquvvat o‘yinchilar bor. Bo‘lajak uchrashuvga tayyorlanish uchun vaqtimiz bor. Hujumkor o‘yin ko‘rsatishga harakat qilamiz. Bu oxirgi imkoniyatimiz. Tavakkal qilamiz.
- Debyutini o‘tkazgan Abbos Abdug‘afforovning o‘yini haqida fikringiz qanday?
- Ko‘ryapsizlar, bizda tayanch yarim himoyasida o‘yinchilarimiz yo‘q. Bu bolani U21 o‘yiniga borib kuzatganimda menga yoqib qolgandi. Shuning uchun qo‘rqmasdan asosiy tarkibda tushirdik. Agar o‘zimga yoqsa kimnidir asosiy tarkibda maydonga tushirishdan qo‘rqmayman.
