"Chelsi"ning sobiq sardori Jon Terri UYEFA va FIFAga murojaat qilib, doping testlarini topshirish qoidalarini qayta ko‘rib chiqishga chaqirdi. Bunga Shotlandiyaning JCH-2026ga chiqqanidan keyingi tarixiy lahza sabab bo‘ldi. Terma jamoa Daniyani 4:2 hisobida mag‘lub etdi, ammo barcha futbolchilar ham bayram quvonchini baham ko‘ra olmadi.

Shotlandiya terma jamoasi futbolchisi Jon Makginn final hushtagidan so‘ng darhol doping-test uchun maxsus xonaga yuborildi, shu sababli u bayramning bir qismini o‘tkazib yubordi.

"Kecha Shotlandiya bilan o‘yinni tomosha qilgan har bir kishi Jon Makginning o‘yindan keyingi hissiyotlari va intervyusini ko‘rdi. U bugun ertalab ijtimoiy tarmoqlarda, afsuski, o‘yindan keyin dopingga tekshirilgani haqida xabar qoldirgan. Test sinovlari alohida xonada, bayramlardan alohida o‘tkaziladi", - deya ta’kidladi Terri.

Terri o‘zining shaxsiy misolini ham keltirdi. 2012 yilgi Chempionlar Ligasi finalida "Bavariya"ga qarshi o‘yinda g‘alaba qozonganidan so‘ng, Pyotr Chex an’anaviy jamoaviy fotosuratlarda deyarli ko‘rinmadi - darvozabon ham majburiy sinovdan o‘tdi.

"Siz bayramni, barcha fotosuratlarni o‘tkazib yuboryapsiz. Bu Pyotr Chex bilan 2012 yilda Myunxenda sodir bo‘lgan. Biz Chempionlar Ligasini yutdik, tarixdagi eng yaxshi kecha, lekin suratlarda Chex yo‘q, chunki u boshqa xonada edi. O‘ylaymanki, UEFA va FIFA bunga e’tibor qaratishi kerak", - deya Jon Terrining so‘zlarini keltiradi Thechelseachronicle.