"Челси"нинг собиқ сардори Жон Терри УЕФА ва ФИФАга мурожаат қилиб, допинг тестларини топшириш қоидаларини қайта кўриб чиқишга чақирди. Бунга Шотландиянинг ЖЧ-2026га чиққанидан кейинги тарихий лаҳза сабаб бўлди. Терма жамоа Данияни 4:2 ҳисобида мағлуб этди, аммо барча футболчилар ҳам байрам қувончини баҳам кўра олмади.
Шотландия терма жамоаси футболчиси Жон Макгинн финал ҳуштагидан сўнг дарҳол допинг-тест учун махсус хонага юборилди, шу сабабли у байрамнинг бир қисмини ўтказиб юборди.
"Кеча Шотландия билан ўйинни томоша қилган ҳар бир киши Жон Макгиннинг ўйиндан кейинги ҳиссиётлари ва интервьюсини кўрди. У бугун эрталаб ижтимоий тармоқларда, афсуски, ўйиндан кейин допингга текширилгани ҳақида хабар қолдирган. Тест синовлари алоҳида хонада, байрамлардан алоҳида ўтказилади", - дея таъкидлади Терри.
Терри ўзининг шахсий мисолини ҳам келтирди. 2012 йилги Чемпионлар Лигаси финалида "Бавария"га қарши ўйинда ғалаба қозонганидан сўнг, Пётр Чех анъанавий жамоавий фотосуратларда деярли кўринмади - дарвозабон ҳам мажбурий синовдан ўтди.
"Сиз байрамни, барча фотосуратларни ўтказиб юборяпсиз. Бу Пётр Чех билан 2012 йилда Мюнхенда содир бўлган. Биз Чемпионлар Лигасини ютдик, тарихдаги энг яхши кеча, лекин суратларда Чех йўқ, чунки у бошқа хонада эди. Ўйлайманки, УEФА ва ФИФА бунга эътибор қаратиши керак", - дея Жон Террининг сўзларини келтиради Thechelseachronicle.
